Навалица за плински уреди во Министерството за економија
Огромен е бројот на граѓани кои деновиве во Министерството за економија поднесуваат барања за вградување плински уреди во возилата, велат од ресорното министерство. Јавниот повик за субвенционирање на дел од трошоците беше објавен пред една недела.
– За оваа мерка интерес имаше и пред почетокот на истата, а од кога беше пуштен јавниот повик има многу граѓани кои ги доставуваат своите барања до Архивата на министерството. Како што знаете, со ребалансот на буџетот за оваа намена се одвоени 15 милиони денари или 250.000 евра – велат од Министерството.
За потсетување, во јавниот повик на Министерството за економија стои дека ќе се субвенционира вградувањето на плински уреди во возилата во висина од 50 отсто од цената, но не повеќе од 18.000 денари (300 евра). Субвенции ќе има за 900 пријавени. Огласот ќе трае 30 дена и ќе се одвива по принципот прв дојден, прв услужен.
Претходно од Министерството за економија беше најавено субвенционирање до 3.000 евра на увоз на автомобили со најмалку еуро 5 стандард, а потоа се споменуваше и варијантата да се намали ДДВ-то за увоз на моторни возила од 18 на под 5 проценти.
– За субвенциите или намалувањето на ДДВ при увозот на возила се уште се сите параметри и податоци околу финансиските импликации во врска со оваа мерка, но која мерка и да биде избрана таа ќе биде имплементирана во Буџетот за следната година – додаваат од министерството.