Апелациониот суд во Ниш во моментов одлучува за обвинението против Дејан Драгијевиќ и Срѓан Јанковиќ, обвинети за убиството на двегодишната Данка Илиќ, како и за таткото на Дејан, кој се товари за помагање во делото. Како што дознава „Нова“, одлуката на судот треба да биде соопштена во наредните 30 дена.

На 21 април, до Апелациониот суд во Ниш беше доставен предметот со кој се потврдува обвинението со кое на Драгијевиќ и на Јанковиќ им се става на товар кривично дело тешко убиство во соизвршителство, а Раде Драгијевиќ се товари за непријавување на кривичното дело и на сторителот, како и за помош на сторителот по извршување на делото.

Нема ниедна биолошка трага

Предметот веќе е доделен на судија известител. За жалбите на бранителите ќе одлучува тричлен судски совет на вонредна седница. Второстепениот суд е должен својата одлука, заедно со списите, да ја достави до Вишиот суд во Неготин во рок од 30 дена од приемот на предметот. Со оглед на тоа што станува збор за притворски предмет, законот налага итно постапување во сите фази од постапката.

Бранителите на обвинетите поднесоа жалби на обвинението, кое во март годинава беше потврдено по вторпат. Главните аргументи на одбраната се темелат на целосно отсуство на материјални докази и на биолошки траги кои би потврдиле дека девојчето е убиено.

Повеќе од 500 извршени анализи не покажаа ниту една биолошка трага од девојчето на местото на настанот, ниту, пак, во службениот автомобил со кој, според обвинението, таа била удрена.

Смрт во притвор и повлечени признанија

Додека Дејан Драгијевиќ и Срѓан Јанковиќ, работници во ЈКП „Водовод“, се наоѓаат во притвор, Радослав Драгијевиќ е пуштен да се брани од слобода.

Случајот дополнително го оптоварува и смртта на Далибор Драгијевиќ, братот на Дејан, кој беше приведен во април 2024 година. Според обдукциските наоди, тој починал во полициската станица во Бор како последица на физичко малтретирање.

За неговата смрт до денес никој не одговарал, а истрагата сè уште е во предистражна фаза.

По овој настан, двајцата главни осомничени ги повлекоа своите првични признанија, тврдејќи дека биле изнудени со тепање и со полициска тортура.

Разрешен е началникот што ја водеше истрагата за Данка Илиќ – зошто не е уапсен ниеден од полицајците што го претепале до смрт Драгијевиќ?

Каде е телото на Данка?

И покрај подигнатото обвинение, сѐ уште нема одговор на најважното прашање – каде е телото на Данка Илиќ? Девојчето исчезна на 26 март 2024 година во Бањско Поле, откако нејзината мајка накратко ја изгубила од вид.

Според тезата на обвинителството, работниците на „Водовод“ ја удриле Данка со службеното возило „фиат“, ја ставиле во багажникот, а кога забележале дека е жива, ја задушиле со раце и ја фрлиле на непозната локација.

Полицијата детално го пребара целиот регион на Бор, депониите, каналите и сите сомнителни локации, но потрагата остана без резултат. Случајот продолжува да ја бранува јавноста поради контрадикторностите помеѓу изјавите на официјалните служби и недостигот на форензички докази.

До каде е случајот со исчезнатата Данка?