Началникот на Одделението за криминалистичка полиција при Полициската управа во Бор, Александар Манчиќ, неодамна беше разрешен. Токму тој беше еден од клучните луѓе што раководеа со истрагата за исчезнувањето на двегодишната Данка Илиќ – случај што ќе остане запаметен по бројните пропусти и неодговорени прашања.

Манчиќ пред заминувањето од функцијата треба да одговори на неколку клучни прашања што ја интересираат јавноста во Србија, пишува „Нова“.

Со решение на директорот на полицијата, за нов началник на Одделението за криминалистичка полиција е назначен мајорот Драган Гергиќ, долгогодишен оперативец во криминалистичката полиција. Според неофицијални информации, до смената на Манчиќ дошло поради одредени пропусти во работата и лоша организација на работата на криминалистичката полиција во Бор.

Манчиќ оперативно ја водел истрагата за исчезнувањето на малата Данка Илиќ, чиешто тело до денес не е пронајдено.

Случајот ќе остане запаметен по трапаво водената истрага, бројните спорни околности што го следеа, но и по фактот дека полицајци претепале до смрт човек во полициската станица, а за тоа до денес никој не е уапсен.

Токму поради тоа, Манчиќ е должен, пред заминувањето од функцијата, да одговори на неколку прашања.

Каде е телото на детето?

Данка Илиќ исчезна на 26 март 2024 година во Бањско Поле кај Бор.

Набрзо по исчезнувањето следеше обемна потрага на теренот, која траеше со денови и беше една од најголемите во Србија.

Полицијата во тие денови разговараше со сведоци и со мештани, но ништо не укажуваше на тоа што му се случило на детето кобниот ден. Во деновите по исчезнувањето се шпекулираше што му се случило на девојчето, а истрагата одеше во повеќе правци.

Неколку дена подоцна се појави снимка од Виена на која имаше девојче што личеше на Данка Илиќ, по што потрагата беше проширена и на Австрија.

Австриската полиција соопшти дека е утврдено оти детето на снимката не е Данка Илиќ. Набргу потоа стигнаа и првите официјални информации за тоа што, според тврдењата на полицијата, му се случило на девојчето.

Претседателот на Србија, Александар Вучиќ, тогаш соопшти дека Данка е убиена, дека две лица се приведени и дека го признале делото. Станува збор за работници на ЈКП „Водовод“ од Бор – Срѓан Јанковиќ и Дејан Драгијевиќ, кои на 26 март службено биле во Бањско Поле.

Она што до денес отвора прашања е како телото на детето сѐ уште не е пронајдено.

Особено збунувачки е фактот што осомничените првин го признале злосторството, а потоа ги повлекле признанијата.

Се поставува и прашањето како е можно осомничените, доколку навистина го признале делото, да одбијат да ѝ кажат на полицијата каде е телото на детето.

Осомничените за убиството на двегодишната Данка Илиќ испратени на Психијатрија, не кажуваат каде е телото

Дали признанијата биле изнудени?

Токму тука се отвора уште едно прашање – дали признанијата на осомничените биле изнудени?

Двајцата осомничени тврделе дека признанијата им биле изнудени со тепање во полициската станица.

Пред обвинителството тие ги повлекле тие искази.

Првин обвинетиот Срѓан Јанковиќ го повлекол исказот што го дал во полиција, тврдејќи дека бил изнуден. Навел дека кобниот ден ниту ја видел Данка, а камоли дека ја удрил, како што му се става на товар.

Набрзо потоа истото го направил и другиот осомничен, Дејан Драгијевиќ. Тој потврдил дека на 26 март престојувал во Бањско Поле, но изјавил дека не го видел девојчето и дека нема никаква врска со кривичното дело за кое се товари.

Кој го уби Далибор Драгијевиќ?

Истрагата за исчезнувањето на Данка Илиќ од самиот почеток беше засенета од бројни пропусти, но целиот случај дополнително беше потресен од смртта на Далибор Драгијевиќ во полициската станица во Бор.

Драгијевиќ, брат на еден од осомничените за убиството, беше приведен под сомнение дека помогнал во отстранувањето и преместувањето на телото. За време на престојот во полициската станица, според првичните наводи, му се слошило за време на сослушувањето. Полицијата соопшти дека веднаш му била укажана помош, но дека и покрај тоа починал.

Меѓутоа, околностите околу неговата смрт бргу беа доведени во прашање. Порталот „Радар“ објави дека обдукцискиот наод укажува на насилна смрт и на бројни повреди по телото.

Во записникот од обдукцијата, составен еден ден по констатирањето на смртта, на повеќе страници детално се наведени повредите, со напомена дека ваквите наоди во пракса се ретки.

Според вештачењето, изработено на 8 јули од тројца лекари од Институтот за судска медицина во Белград, повредите биле бројни, настанувале континуирано и укажувале на примена на сила. Опишани се крвни подливи во пределот на ушите, повреди на тестисите и табаните, како и траги од удари нанесени со тврд предмет.

Во извештајот се наведува дека поткожното ткиво на табаните било тешко оштетено и натопено со крв, додека скршениците на поголем број ребра, од двете страни на градниот кош, исто така, биле поврзани со можно претепување.

Зошто полицајците не се уапсени?

Овие наводи отворија сериозни прашања за постапувањето на полицајците и дополнително ги продлабочија контроверзиите што го следат целиот случај.

Секторот за внатрешна контрола и обвинителството тврдат дека го испитуваат случајот со смртта на Драгијевиќ, но до денес не е познато кои полицајци биле сослушани, дали некој од нив е суспендиран и зошто никој не е уапсен за убиството, речиси една година по смртта.

На сите овие прашања требало да одговори разрешениот началник Манчиќ.

До каде е случајот со исчезнатата Данка?