НАСА се подготвува за лансирање на првиот екипаж астронаути кон Месечината по повеќе од 53 години, во рамки на мисијата „Артемис два“, клучен тест-лет во пошироката програма за истражување на вселената, објави „Ројтерс“.

Тројца американски и еден канадски астронаут треба да полетаат во среда од Флорида на десетдневна мисија околу Месечината и назад, користејќи ја капсулата „Орион“ и ракетата „Систем за вселенско лансирање“.

Ова е прва мисија со екипа во рамки на програмата „Артемис“, која од 2012 година чинеше најмалку 93 милијарди долари. НАСА планира повторно слетување на Месечината во 2028 година, првпат по мисијата „Аполо 17“ од 1972 година.

Екипата ја сочинуваат астронаутите на НАСА: Кристина Кох, Виктор Гловер и Рид Вајзман, како и Канаѓанецот Џереми Хансен, кој ќе биде првиот канадски астронаут што ќе се доближи до Месечината. Учеството на Хансен е резултат на договор меѓу НАСА и Канадската вселенска агенција од 2020 година.

НАСА се потпира на соработка со компаниите „Боинг“, „Нортроп Груман“ и „Локхид Мартин“, додека „Спејсикс“ и „Блу ориџин“ развиваат сопствени лунарни летала со финансиска поддршка од НАСА. Според извештај, до 2050 година активностите на површината на Месечината би можеле да донесат приходи од 127 милијарди долари, со инвестиции меѓу 72 и 88 милијарди долари.

„Артемис два“ ќе тестира клучни системи на капсулата „Орион“, вклучувајќи поддршка за живот, навигација и комуникација. Лансирањето е закажано за 1 април, со можност за одложување до 6 април, во зависност од временските услови и техничките фактори.

НАСА планира мисијата „Артемис три“ во 2027 година да вклучи спојување на капсулата „Орион“ со лунарни летала, додека првото слетување на астронаути на Месечината е поместено за мисијата „Артемис четири“.

Скриен древен речен систем е пронајден длабоко под површината на Марс