Независниот академски синдикат (НАкС) смета дека дискусијата по повод отпочнувањето на разговори од страна на раководството на УКИМ за зголемување на висината на студентската партиципација е во погрешна насока и нема да го реши проблемот со финансирањето на високото образование и науката во државата. Од НАкС велат дека универзитетите треба да предлагаат решенија кои се во насока на подобрување на транспарентноста на финансирањето и реализацијата на буџетот од Министерството за образование и наука (МОН), а не во зголемување на издатоците на грбот на студентите.

-НАкС, од своето основање во 2016-та година до денеска, се бори за воведување на транспарентен систем на финансирање во високото образование. Со ова подразбираме создавање јасна методологија за креирање на буџетот на Министерството за образование и наука, со воспоставени критериуми за распределба и реализација на средствата кон различните високообразовни и научни институции, и секако, критериуми по кои се формираат платите на кадарот во секторот високо образование и наука – се вели во соопштението од Независниот академски синдикат.

Според нив, студентската партиципација треба да се користи за подигнување на студентскиот стандард, вклучувајќи ги опремата и материјалите кои им се потребни за да бидат подобри студенти, а никако за покривање на другите трошоци на универзитетите.

Одговорноста за финансирањето на високообразовните и научните установи припаѓа исклучиво на државата и ресорните министерства, а понатака на раководствата на универзитетите и факултетите -додаваат од синдикатот.

Реакцијата на Независниот академски синдикат доаѓа откако дел од медиумите објавија информација дека ќе се зголемува партиципацијата на студентите на Универзитетот „Св. Кирил и Методиј“, што потоа беше демантирана од Министерството за образование.

Од УКИМ соопштија дека планираат да достават барање до Владата за зголемување на партиципациите од 200 на 400 евра и од 400 на 800 евра, со тоа што разликата во износите би паднала исклучиво на товар на Буџетот на државата, а не на студентите.