Пензионираниот сточар Декстер Кругер во понеделникот одбележа 124 дена откако наполни 111 година, со што е еден ден постар од ветеранот од Првата светска војна, Џек Локет, кој почина во 2002 година, пишува „Еј-Би-Си Њуз“.

Кругер од домот за стари лица во руралниот град Рома во Квинсленд неодамна за „Australian Broadcasting Corp“ изјавил дека еден деликатес од живина e заслужен за неговата долговечност.

„Пилешки мозоци. Знаете, кокошките имаат глава. И таму, има мозок. И тие се вкусни мали нешта. Нивниот мозок е само едно залче“, вели Кругер.

74-годишниот син на Кругер, Грег, вели дека за долговечноста на неговиот татко исто така е заслужно и тоа што поголемиот дел од својот живот го поминал далеку од градот.

Менаџерката на домот за стари лица Мелани Калверт вели дека Кругер, кој ја пишува својата автобиографија, е „веројатно еден од најостроумните жители таму“.

„Неговата меморија е неверојатна за 111-годишник“, вели Калверт.

Џон Тејлор, основач на Австралиската книга на рекорди, потврди дека Кругер е најстариот човек во Австралија. Досега најстарата Австралијка беше Кристина Кук, која почина во 2002 година на 114 години и 148 дена.