Здружението на новинарите на Македонија (ЗНМ), во соработка со Програмата за развој на Обединетите нации (УНДП) со поддршка од Шведска, денеска ги додели наградите за најдобри новинарски стории за 2025 година на тема „Справување со загадувањето на воздухот – јакнење на јавната свест за проблемите и можните решенија“.

Првата награда отиде кај Михаил Милошевски за сторијата „Уште пет града дознаа што им го загадува воздухот, што ќе преземат градоначалниците“, објавена на 360 Степени.

„Станува збор за сеопфатна видео-сторија која вклучува релевантни соговорници од институции, локални власти, експерти, граѓански организации и граѓани. Истражувањето опфаќа едногодишно земање мостри и мерења, при што се утврдуваат конкретните извори на загадување во повеќе града во државата. Според комисијата, сторијата е изработена согласно највисоките професионални стандарди и нуди јасен увид во проблемот, но и можни насоки за негово надминување“, соопштија од ЗНМ.

Второнаграден е Бојан Блажевски од Призма за сторијата „Властите виновни за занемарувањето на македонската депонија со фосфогипс“.

„Комисијата оцени дека оваа истражувачка сторија нуди темелна анализа, богата документација и визуелизации, со што придонесува за продлабочување на јавната дебата и отчетност на институциите“, рекоа од ЗНМ.

Трета награда му се додели на Владимир Калински од Радио Слободна Европа за сторијата „Секој здив боли“, која преку лична приказна ја прикажува човечката димензија на аерозагадувањето и неговото влијание врз здравјето на граѓаните.

„Станува збор за силен и професионално изработен текст кој ја доближува темата до јавноста преку емотивен, но аргументиран пристап“, оценува жири-комисијата.

Дополнително, доделено беше посебно признание на Орце Костов од Фокус за сторијата „Ниедна мерка не дава резултат, скопјани дишат најотровен воздух во Европа“, како поттик за понатамошна работа на теми од областа на животната средина и истражувачко новинарство.

Претседателот на ЗНМ, Младен Чадиковски ја нагласи улогата на новинарите во кревањето на јавната свест и моќта на медиумите да поттикнат институционална одговорност и општествени промени.

„Со темелна анализа и посветена работа, новинарите можат да ги хуманизираат последиците од загадувањето и да покажат како тоа влијае врз семејствата, децата и ранливите категории. Кога приказната ќе добие човечко лице, станува повик на акција”, истакна Чадиковски.

Амбасадорот на Кралството Шведска, Ола Сулстром, се осврна на значењето на поддршката на слободното и професионално новинарство како клучен столб на демократските процеси и одржливи политики за заштита на животната средина.

На јавниот конкурс пристигнаа вкупно 20 новинарски стории, а комисијата беше составена од новинарите Соња Петрушевска, Един Растодер и Горан Момировски.