Со обнова на договорите со Бојан Крстевски (34 год, 208 см) и со Дамјан Робев (26 год, 195 см), како и со повторниот ангажман на Љубомир Младеновски (28 год, 210 см), МЗТ Скопје Аеродром го комплетираше тимот со кој во новата сезона ќе ја брани двојната круна во Македонија и ќе го нападне тронот во АБА2 лигата, а со тоа и враќањето во јадранската елита.

Од Крстевски, кој и петта година по ред ќе биде домашен бедем под кошевите, стручниот штаб на МЗТ Скопје очекува да биде лидер на теренот и надвор од него, како еден од најискусните во ростерот. Пред Робев, пак, е третата сезона во „сино-белиот дрес, во која од него се очекува максимално да ја искористи минутажата и да се наметне како еден од носителите на играта на тимот.

За Младеновски ова е втор камбек во таборот, во кој прво настапуваше во периодот помеѓу 2013 и 2017 година, а потоа и во сезоната 2018/19. Сите пет досегашни сезони во дресот на МЗТ ги круниса со шампионска титула, а сега доаѓа далеку поискусен, но и по потешка повреда, со цел да покаже дека сѐ уште може да игра на највисоко ниво и дека може да даде огромна помош во обидот да се остварат зацртаните цели на клубот.

Доаѓа од редовите на Пелистер, а претходно во два наврати играше за Работнички, а една сезона помина во словенечката екипа Илирија.

Македонската тројка го заокружи тимот од 12 кошаркари на кои ќе смета тренерот Васко Атанасов за претстојната сезона, меѓу кои се и браќата Дамјан и Војдан Стојановски, Андреј Андоновски, Марин Петков, Марко Миловановиќ, Србинот Душан Танасковиќ, Хрватот Марко Баковиќ и Американците Седрик Расел и Ејасу Ворку.

Дел од екипата ќе бидат и неколкумина од најталентираните млади кошаркари на МЗТ, предводени од Бојан Величковски, кои по потреба ќе бидат вклучувани во ростерот за средбите од домашните натпреварувања и АБА2-лигата.