Летните горештини со себе носат и постојани потсетници за важноста на правилната хидратација. Иако внесувањето доволно течности е клучно за здравјето и за избегнување на болести поврзани со топлината, лекарите предупредуваат дека погрешниот пристап кон хидратацијата може да предизвика проблеми со желудникот.

Проблемите најчесто се манифестираат како ждригавица (киселини во желудникот), односно гастроезофагеален рефлукс. Иако звучи необично, пиењето премногу вода или консумирањето вода во одреден период од денот го зголемува ризикот од непријатни симптоми на рефлуксот, истакнува д-р Ашкан Фархади, гастроентеролог во Медицинскиот центар „МеморијалКеар оринџ коуст“. Причината за ова е донекаде сложена и поврзана со механиката на телото. Ако сте склони кон рефлукс, важно е да знаете дека вашите летни навики за хидратација можат да ја влошат состојбата.

Зошто воопшто доаѓа до рефлукс?

Гастроезофагеалниот рефлукс е состојба во која содржината на желудникот се враќа во хранопроводот. Многу луѓе тоа повремено го доживуваат, а понекогаш рефлуксот поминува и без забележливи симптоми. Оние кои имаат симптоми може да доживеат ждригавица, враќање на храната, гадење, болка при голтање, хронична кашлица или засипнатост. Рефлуксот обично се појавува кога долниот сфинктер на хранопроводот, мускул кој го спречува враќањето на желудочната киселина, ослабува или се опушта кога не треба, објаснил д-р Фархади.

Премногу вода одеднаш може да ги влоши симптомите

Во лето, лесно е да се пие голема количина вода одеднаш, но умереноста е подобра за нашиот желудник.

„Пиењето големи количини вода може да го зголеми волуменот на желудникот. Кога се зголемува волуменот на желудникот, се зголемува и притисокот, што доведува до притисок кон нагоре низ долниот езофагеален сфинктер. Ова може да го интензивира рефлуксот и да предизвика непријатни симптоми“, објаснил д-р Риши Наик, гастроентеролог на Универзитетот Вандербилт.

Експертите се согласуваат дека распоредувањето на внесот на вода во текот на денот е полесен за желудникот.

„Овој сфинктер делува како вентил кој го штити хранопроводот од рефлуксот, но кога притисокот е превисок, може да дојде до враќање на содржината низ вентилот, влошувајќи ги симптомите на ждригавицата, односно на киселините во желудникот“, рекол Наик.

Водата сама по себе не е кисела, напоменува д-р Субанкар Чакраборти, гастроентеролог на Државниот универзитет во Охајо.

„Но, начинот на кој се растегнува желудникот може да доведе до рефлукс. Сепак, овој феномен не влијае на сите. Некои луѓе можат да се справат со вишокот вода без проблем. Но, оние со киселини во желудникот се во неволја“, рекол Фархади.

Времето на внес на вода е исто така важно

Освен што преплавувањето на желудникот со вода одеднаш го зголемува ризикот, истото важи и за пиењето голема количина вода веднаш по оброкот, вели д-р Елен Штајн, гастроентеролог од Универзитетот Рутгерс.

„Лесно можете да го надминете капацитетот на желудникот, што може да предизвика зголемување на нивоата на течности и да предизвика повеќе симптоми на рефлукс“, рекла таа. „Тоа е исто како прејадувањето. Секогаш е подобро да бидете сити, но не и преполнети.“

Луѓето со рефлукс обично имаат повеќе симптоми по јадењето, па затоа пиењето премногу вода во тој момент дополнително го влошува проблемот, додава Чакраборти.

Како правилно да се хидрирате без непријатни симптоми?

Постојат неколку стратегии за намалување на ризикот од симптоми на киселини во желудникот.

„За да се спречи рефлукс, подобро е да пиете мали количини вода во текот на целиот ден, наместо многу одеднаш, особено во текот или веднаш по оброкот“, советува Чакраборти.

Д-р Наик предлага прошетка по оброкот.

„Тоа ја зголемува подвижноста – способноста на желудникот да се стегнува – и ја движи содржината понатаму во дигестивниот тракт за да се спречи рефлуксот“, рекол тој.

Д-р Штајн препорачува реален пристап кон потребите за хидратација.

„Пиењето доволно течности во текот на денот не е толку тешко ако го правите тоа од почетокот до крајот на денот“, рекла таа. Нејзиниот совет е да пиете кога ќе почувствувате жед и да внесувате вода рамномерно.

„Обично ги потсетувам луѓето да испијат малку вода кога ќе се разбудат, малку со појадок, голтка во средината на утрото, малку со ручек, попладне, со вечерата и рано навечер“, рекла таа.

Бојата на урината е добар показател – треба да биде бистра до бледожолта.

Исто така, корисно е да се избегнува јадење непосредно пред спиење и легнување по оброкот. Ограничувањето на кисела храна, чоколадо, алкохол, кафе, нане и зачинета храна исто така може да помогне. Ако сте ги пробале сите овие и сè уште имате проблеми, д-р Фархади вели дека е време да побарате лекарски совет.