Кога станува збор за претстојните велигденски и првомајски празници, д-р Бошко Милев, хирург во Воено-медицинската академија (ВМА) во Белград, открил дека лекарите имаат полни раце работа веднаш по нив, пишува „Србија данас“.

Во тие денови од празникот, неопходна е богата трпеза, многу храна, претежно мрсна и силна, како што се печено месо или скара, како и алкохол. Ако сето ова се претера, здравствените последици се неизбежни, предупредуваат лекарите.

Прејадувањето со тешката храна може да доведе до посериозни компликации, дури и до откажување на органите, предупредил д-р Бошко Милев.

По повод претстојното славење на Велигден, д-р Милев рекол за РТС дека луѓето многу често претеруваат со храната, без да размислуваат за сериозните последици по здравјето.

– Секако, ќе има сигурно и богата трпеза, а знаеме дека тоа може да доведе до појава на панкреатитис, што е бенигна болест. Меѓутоа, може да биде придружено како со лесни, така и со тешки компликации, може да доведе до откажување на органите, бубрезите, белите дробови, па дури и срцето. Билијарниот панкреатит е најчест, а потоа доаѓа на ред и алкохолниот панкреатит – изјавил д-р Милев за РТС.

Токму поради ова, тој апелирал до сите за умереност во храната, особено во тешката и мрсната храна.

Што е панкреатит?

Панкреасот е жлезда над желудникот, покрај тенкото црево. Панкреатитот настанува поради воспаление на панкреасот кога ензимите за варење го напаѓаат панкреасот пред да одат во тенкото црево, наведува „Стетоскоп“.

Постојат два вида на панкреатит: акутен и хроничен.

Акутен панкреатит се појавува кога ензимите почнуваат да вршат автодигестија на панкреасот, односно разорување на оваа жлезда. Болеста се санира со соодветна терапија, а функцијата на панкреасот по извесно време се враќа во нормала.

За настанување на акутен панкреатит може да бидат одговорни многу фактори, како што се:

– консумирање алкохолни пијалаци
– болести на жолчните канали
– постоперативни состојби
– метаболички нарушувања
– инфекции
– панкреатит предизвикан од лекови.

Механизмите со кои различни фактори го започнуваат воспалението на панкреасот не се идентификувани.

Симптоми на панкреатит

Абдоминалната болка е главен симптом на акутниот панкреатит.

Болката е остра по интензитет, постојана и се шири во појасот. Болката е често поинтензивна во лежечка положба и пациентите се чувствуваат подобро кога седат и се наведнуваат напред.

Покрај тоа, многу често се појавуваат гадење, повраќање, надуеност на стомакот, слабост, потење и вознемиреност. Болката може да се влоши по пиењето алкохол, може да се влоши при јадење или пиење, особено мрсна или храна со висока содржина на масти. Тогаш болката се појавува во рок од неколку минути по оброкот.

Кај повеќето пациенти, болеста поминува брзо, обично по 3-7 дена по почетокот на терапијата. Лекувањето се состои првенствено од внесување на голема количина течност во телото, ублажување на болката со лекови против болки и спречување на внесување храна и течности во устата, со што се ограничува активноста на панкреасот.

Со диетата се започнува 3-6 дена по болеста.