Музејот Лувр неодамна го објави победничкиот дизајнерски тим кој стои зад проектот „Louvre Nouvelle Renaissance“ (Нова ренесанса на Лувр) – сеопфатен проект за развој чија цел е да се намали метежот, да се модернизира движењето на посетителите и создавање нов, посветен дом за „Мона Лиза“. Архитектонските студија „Selldorf Architects“ и „Studios Architecture Paris“, заедно со пејзажните архитекти од „Base“, победија на меѓународниот конкурс, пишува „Мајмодернмет“.

Овој проект претставува една од најголемите архитектонски трансформации на музејот уште од дебито на стаклената пирамида на И. М. Пеј во 1989 година.

Наместо да остане во преполната сала „Salle des États“, „Мона Лиза“ ќе биде преместена во наменски изградена галерија под плоштадот „Cour Carrée“. Новиот изложбен простор има за цел да им овозможи на посетителите помирно и повпечатливо искуство при гледањето, истовремено намалувајќи го притисокот врз најфреквентните простории во Лувр. Новиот амбиент на сликата ќе вклучува и посебен пристапен пат, дизајниран специјално за подобро управување со масовните толпи кои секојдневно се собираат околу портретот.

Редизајнот е фокусиран на источната фасада на Лувр, позната како „Grande Colonnade“. Плановите вклучуваат нови подземни влезови, проширени патеки, ажурирана инфраструктура и дополнителни галериски простори интегрирани под историскиот комплекс. Француското Министерство за култура го пофали победничкиот предлог поради неговата способност да ја балансира современата архитектура со околното историско наследство, истовремено подобрувајќи го целокупното искуство на посетителите.

Проектот доаѓа по сè поголемата загриженост поради пренатрупаноста на Лувр, кој годишно пречекува речиси 9 милиони посетители. Официјалните лица на музејот се надеваат дека редизајнот ќе ги поттикне посетителите подлабоко да се запознаат со пошироката колекција на Лувр, наместо да брзаат директно само кон едно уметничко дело.

Од архитектонски аспект, овој проект ја продолжува долгата историја на обновувањето на Лувр. Првичните визуелизации покажуваат суптилни интервенции од стакло и камен интегрирани во пејзажот под колонадата, создавајќи полесна врска меѓу надворешноста на палатата и новите подземни простори. Наместо да се натпреварува со историската архитектура, дизајнот се обидува тивко да ги вклопи современите елементи во постојната структура.

Оваа најава веќе поттикна дебати за иднината на музејскиот дизајн и за предизвикот да се балансира меѓу пристапноста за јавноста и зачувувањето на уметничките дела. Сепак, проектот рефлектира и една поголема културна промена, големите музеи сè повеќе мораат да го преиспитаат начинот на кој публиката се движи низ просторите обликувани од глобалниот туризам, социјалните мрежи и „блокбастер“ уметничките дела кои привлекуваат милиони луѓе секоја година.

Изградбата ќе се одвива во текот на следните неколку години, а завршувањето се очекува на почетокот на 2030 година. Кога ќе биде завршен, редизајнот би можел целосно да го преобликува искуството во Лувр, префрлајќи го вниманието од избезумените толпи околу една единствена слика кон пошироко и побогато доживување на самиот музеј. За „Мона Лиза“, чија слава одамна го надмина просторот на нејзината галерија, ова преместување го означува почетокот на едно ново поглавје.