МОН објави Конкурс за автори за новите учебници за седмо одделение
Министерството за образование и наука денеска го објави Конкурсот за автори за новите учебници за седмо одделение, што ќе се користат од следната учебна година. Според објавениот конкурс, МОН очекува понуди за издавање по еден учебник за седмоодделенци за наставните предмети: Македонски јазик, Албански јазик, Српски јазик, Турски јазик, Босански јазик, Математика, Природни науки, Историја и општество и Албански јазик (изборен предмет) за седмо одделение и Албански јазик (јазик на заедницата) за петто одделение.
Надоместот за пренос на материјалното авторско право за секој од учебниците е во нето износ од 327.510 денари. Право на учество на Конкурсот имаат авторите кои ги исполнуваат условите пропишани со членот 10 од Законот за учебници за основно и средно образование.
Во објавениот Конкурс се наведени условите и начинот на учество, критериумите за избор на автори што ќе се пријават и документацијата што треба да биде поднесена. Рокот за доставување на ракописите за учебници ќе заврши на 15 јануари 2024.
Бирото за развој на образованието, минатата недела го испочитува рокот и навреме ги достави наставните програми за 2024/2025 година за седмо одделение, кои ќе бидат изработени по новата Концепција за основно образование.
Оваа учебна година, доцнеа учебниците за шесто одделение, бидејќи БРО во март ги достави наставните програми. Министерот завчера посочи дека сега ќе има доволно долг период за учебниците за седмоодделенците во идната учебна година да се изработат и распределат навреме.
-Во минатиот период имавме проблеми, но сакаме да докажеме дека со навремени повици за автори ќе имаме долг период за изработка и печатење на учебниците за наредната учебна година, изјави завчера Шаќири.