Ракометната репрезентација на Македонија вечерва (20.30 часот) против Бахреин го стартува настапот на традиционалниот „Жолт куп“, турнир кој секоја година се одржува во Швајцарија.

По интензивните и квалитетни подготовки во Пореч и Скопје, стручниот штаб и ракометарите јасно ја имаат поставено целта, преку три натпревари во три дена да се фати посакуваниот натпреварувачки ритам, неопходен за оптимална форма пред настапот на Европското првенство во Хернинг.

Иако Македонија важи за фаворит во дуелот со Бахреин, резултатот е во втор план. Поважно ќе биде да се забележи напредок во играта и да се направат последните корекции пред вистинските предизвици што следуваат на ЕП 2026.

„Атмосферата е одлична, успеавме колку толку да се одмориме, иако имавме тежок пат. Утрово имавме некоја активација да се видиме до каде сме и можам да кажам дека е одлично. Подготвени сме за вечерва, стручниот штаб има некои тактики кои ќе се обидеме да ги спроведеме вечерва како за прв натпревар пред Европското првенство, ќе дадеме максимум и ќе се обидеме да победиме пред се за нас за да ја кренеме атмосферата и уште повисоко ниво“, изјави пред натпреварот репрезентативецот, Михаил Аларов.

По вечерашниот меч со Бахреин, македонските ракометари утре ќе се соочат со Украина, додека в сабота, во последниот натпреварувачки ден, ќе играат против домаќинот Швајцарија.