17-годишно момче од Скопје завршило на дежурен лекар откако испило голема количина енергетски пијалак, објави „Канал 5“.

Лекарите предупредуваат дека кај младите сè почесто се забележува тренд на претерано пиење вакви пијалаци богати со кофеин и таурин, кои често се користат за одржување будност и дополнителна енергија. Енергетските пијалаци не смеат да им се продаваат или служат на деца, но забраната ретко кој трговец или угостител ја почитува.

Токсикологот проф. д-р Андон Чибишев, за „Канал 5“ изјави дека внесувањето енергетски пијалоци во големи количества може сериозно да го наруши здравјето.

„Со овие производи земени во голема количина може да се предизвика висок притисок, а исто така влијаат и на нервниот систем. Може да предизвикаат еуфорично и несоодветно однесување што носи негативни последици“, вели Чибишев.

Особено загрижувачки, нагласува тој, е што енергетските пијалоци стануваат дел од „забавата“ кај децата и тинејџерите, кои често ги комбинираат со алкохол.

Таквата комбинација, вели Чибишев, може да биде исклучително опасна.