Нема здравствен криза која нема далекусежни последици. Една од тие последици е енергетската војна, која што во овие моменти се одвива. Другата криза е економска – стоковите размени, интелектуалните услуги…

Во овој момент сите граници се блокирани, светот е во херметички затворена средина. Може ли во такви услови да се размислува за производство и за кого би се произведувало. Во меѓувреме, има домашни актуелности кои побудуваат стереотипни, конзервативни настапи, но истовремено и мотивација за повторно извлекување на поуки од оваа здравствена криза.

Гостин во „Утрински брифинг“ на „Слободна ТВ“ беше проф. Никица Мојсоска – Блажевски, шеф на НВО Македонија 20-25.

-Она што ја опишува оваа криза е комбинацијата на кризата со САРС и кризата од 2008 година (економска и финансиска). Како општество или како човештво воопшто, вакво нешто досега не сме виделе. Тоа го доведува во прашање преземањето или непреземањето на мерки од страна на Владите. Така веројатно пред една незивесност е поставена и нашата монетарна и фискална политика, рече Мојсоска – Блажевски.

Оваа криза покажа дека кинескиот систем е силен, а тоа најлесно може да се види на начинот на кој се справија со коронавирусот, но и помогнаа на Италија кога ЕУ немаше слух за нив.

-За жал кризата направи голем удар на глобализацијата, на солидарност, особено на ЕУ. Италија побара помош од ЕУ, но не доби одговор. Помошта дојде од Кина. Така што сметам дека Кина му покажува на светот, или самата криза покажува на светот колкава е зависноста од Кина во повеќе области, но и то колку е силен кинескиот систем и како тие се справија со Корнавирусот, вели таа.

Кина е исто така и пример за криза на побарувачка и понуда.

-Зависноста од Кина е на две основи – како пример ќе го земам Apple. Загриженоста беше дека нема да можат да продаваат стока, но од друга страна и понудата на Apple паѓа бидејќи дел од производството се одвива во Кина или со делови произведени во Кина. Значи тоа е двоен удар и тоа е најголемиот проблем во оваа криза. Криза на побарувачка и понуда, изјави Мојсоска – Блажевски.

Нашата економија ќе трпи последици.

-Истото ќе се осети или осеќа и во нашата економија. Има намалена побарувачка за наши производи, но и од друга страна и компаниите немаат суровини да произведуваат.Она што е страшно за економските политики е што полесно може да делувате на криза на побарувачката, но многу тешко може преку фискална или монетарна политика да се делува на кризата на понудата, вели Мојсоска – Блажевски.