НФЛ тимот на Денвер бронкос стана најскапо продаден спортски клуб во САД откако новите сопственици платија дури 4,65 милијарди долари.

Нови сопственици на Денвер бронкос кој има три шампионски титули во НФ лигата е групата Волтон-Пенер која ја предводи милијардерот и претседател на „Волмарт“, Роберт Волтон.

Досегашниот рекорд на најскапо продаден спортски клуб во САД го држеше бејзбол тимот на Њујорк метс кој беше продаден за 2.4 милијарди долари. Најскапо продаден НФЛ тим е Каролина пантерс за која новиот сопствени Дејвид Тепер во 2018 година плати 2,28 милијарди долари.

Продажбата на Денвер започна во 2019 година кога почина тогашниот сопственик Пет Боулен кој бронкос го купи во 1984 година за околу 70 милиони долари.

– Среќни сме што успешно ја завршивме работата за купување на Денвер бронкос. Кери, Грег и јас сме воодушевени од можноста што ни се укажа бидејќи сега сме дел од големата заедница на Денвер. Долго време живеев и работев во Колорадо и им се воодушевував на бронкос – изјави Роберт Волтон.