Михајловски и Самсоненко разговараа за иднината на Вардар
Почесниот претседател и поранешен финансиер на Вардар, Михајло Михајловски и сегашниот сопственик, Сергеј Самсоненко заедно со ракометарите одржаа состанок на кој им бил презентиран планот за спас на „црвено-црните“.
Михајловски најави дека до почетокот на фајнал фор турнирот во Келн ќе бидат познати сите детали околу финансирањето на екипата во иднина. Како и што се најавуваше изминатите неколку денови, Самсоненко е подготвен да остане прв човек на Вардар, ќе ги намали инвестициите, но затоа е најавен влез на неколку заинтересирани фирми и финансиери меѓу кои е и Михајловски, како би се креирал милионски буџет со кој Вардар би останал во врвот на европскиот ракомет.
Ракометарите кои веќе имаат потпишано договори со други екипи, ќе си заминат, а разговарано е со останатите, во најскоро време ќе започна преговори за нивно останување во екипата и за следната сезона.
Еден од ракометарите кои најавија дека ќе остане во Вардар е германскиот репрезентативец Дисингер, а покрај него се очекува да останат уште и капитенот Стоилов, Скубе, Дибиров, Недановски, Поповски и Горбок. Неизвесен е и статусот на тренерот Роберто Гарсија Парондо, кој минатата недела стана селектор на Египет.