Македонија поразена од Грузија на стартот од Европското првенство
Машката кошаркарска репрезентација на Македонија „Под 18“ години не успеа со победа да го отвори настапот на Европското првенство од Дивизијата „Б“, кое денеска започна во хрватските градови Ријека и Опатија. Во натпреварот од првото коло во групата „Д“, нашите јуниори беа поразени од селекцијата на Грузија со 83:66.
Препорачано
-
1
-
2
-
3
По израмнетиот почеток, во кој Грузија ја доби првата четвртина со минимални 17:16, македонската репрезентација одигра одличен втор период. Предводени од расположениот Цветковски, кој беше главната напаѓачка сила на нашиот тим, јуниорите направија серија од 19:9 и во 16 минута поведоа со 35:26.
Сепак, противникот возврати во самиот финиш на првото полувреме, ја анулираше негативата со серија од десет неодговорени поени, а на одмор се замина со нерешен резултат 36:36, откако Ѓорѓевиќ погоди за израмнување.
Во продолжението се водеше рамноправна борба, но Грузија постепено ја презеде контролата врз резултатот. Со серија на крајот од третата и почетокот на последната четвртина, противникот создаде двоцифрена предност (62:49), која Македонија не успеа да ја надомести. Нашите кошаркари успеаја да намалат на 62:55, но Грузија одговори со нова серија од осум поени, и го приведе натпреварот до конечни 83:66.
Најефикасен во македонската репрезентација беше Ѓорѓи Цветковски со 20 поени, три скока и три асистенции, капитенот Григориј Ѓорѓевиќ натпреварот го заврши со 11 поени, три скока и две асистенции, додека Лука Чучанов беше блиску до двоен ефект, заврши со девет поени и исто толку скокови.
Во второто коло од групата „Д“, Македонија утре (25 јули), со почеток од 18.00 часот, ќе игра против селекцијата на Босна и Херцеговина, која во првото коло беше поразена од Унгарија со 93:82.
ЕВРОПСКО ПРВЕНСТВО – ДИВИЗИЈА „Б“ – „ПОД 18“-МАЖИ – РИЈЕКА И ОПАТИЈА 2026
ГРУПА Д
РЕЗУЛТАТИ
1.КОЛО
БиХ – Унгарија 82:93
Грузија – МАКЕДОНИЈА 83:66
Шведска – слободна
