Место каде високите потпетици се забранети со закон
Некои работи во животот ги откриваме на потешкиот начин. Секое место има некои свои пишани или непишани правила, од начинот на кој им оставаме бакшиш на келнерите, па се до тоа како се облекуваме.
Ако заминете за Грција со намера да ги посетите старите храмови и античкиот дел на Атина, едно парче облека ќе ви биде вишок. Имено, со закон е забрането да се движите низ Партенон и Акропол на високи потпетици. Забраната се однесува на секој стар, зачуван дел каде патеките се поплочени со стар камен.
Колку и да сте воодушевени што ќе се движите во патот на Сократ, Платон, Аристотел… сепак размислете што ќе облечете на нозете. Грците ги предупредуваат туристите дека и каменот може да се изрони, а острите високи потпетици можат сериозно да го оштетат. Звучи чудно, но и каменот е нежен, особено кога е толку стар.
Иако ова правило би требало да биде логично, барем од практични причини, бидејќи навистина е тешко да се движите по нерамните камења со високи потпетици, многумина не обрнуваат внимание на тоа.
Со оглед на тоа дека иста мака има и Рим, но и другите стари градови со стари градби, се очекува и тие да воведат слична забрана доколку жените не одлучат да се спуштат малку пониско на земјата.