Комисијата за заразни болести со нова методологија, слична на таа на американскиот Центар за контрола и превенција на болести, ќе мери колку брзо се шири коронавирусот во земјава, односно дали има висок, среден или низок ризик од трансмисија. Целта на оваа методологија е да се димензионираат превентивните мерки, меѓу кои носењето маски и употребата на вакцинални сертификати, во согласност со актуелната епидемиолошка состојба.

Портпаролот на Комисијата доктор Злате Мехмедовиќ за „Слободен печат“ вели дека новата методологија ќе биде готова следната недела.

– Сакаме да избегнеме сценарија како во Австрија и во Данска, на пример, каде што се зголемува бројот на позитивни и хоспитализирани случаи. Не сакаме да го оптоваруваме нашиот здравствен систем, па затоа ќе воведеме нова методологија, со која ќе ја проценуваме преносливоста на вирусот и неговата опасност. Методологијата очекувам да ја имаме следната недела и базирано на неа ќе носиме внимателни и издржани мерки. Откако се укинаа некои од мерките, ќе имаме попретпазлив пристап и ќе следиме како ќе се шири вирусот за да избегнеме скок во бројот на хоспитализации и нови случаи – вели д-р Мехмедовиќ.

Тој појаснува дека и понатаму Министерството за здравство ќе објавува дневни извештаи за тоа колку лица се заразени, колку починати и колку хоспитализирани како последица на ковид-19, но дека се воведува и дополнителна алатка што се користи во САД за да се процени брзината на ширење на вирусот. Пресметката се прави врз основа на бројот на новооткриени случаи во последните 7 дена на 100 илјади жители, број на хоспитализации во последните 7 дена на 100 илјади жители и процентот на исполнетост на здравствени капацитети во последните 7 дена.

Методологијата е дадена на разгледување во Министерството за здравство, можно е да биде адаптирана за наши услови. Предлогот е според овие параметри епидемиолошкиот ризик да биде класифициран како низок, среден или висок, а за секоја од тие состојби се предвидува пакет мерки на индивидуално и на  општествено ниво, велат од МЗ за „Слободен печат“.

Д-р Мехмедовиќ вели дека бројките на новозаразени и на хоспитализирани опаѓаат, репродукцискиот број е 0.73, што значи дека овој актуелен бран на епидемијата полека одминува.

– Доколку внимателно ги релаксираме мерките, нема да ни се случи да имаме нагло зголемување на бројот на заразени и хоспитализирани. Затоа не избрзуваме и не донесовме нови мерки оваа недела. Во средата ги затворивме ковид-центрите на нервно и на кожно и целта е да се вратат клиниките во нормален систем на функционирање. Затоа внимателно се олабавуваат мерките – додава д-р Мехмедовиќ.