НБРСМ: Надворешниот долг на Македонија се искачи на речиси 13 милијарди евра
Надворешниот долг на Република Северна Македонија продолжува да расте. Според најновите податоци на Народната банка, на крајот на првиот квартал од 2026 година бруто надворешниот долг достигнал 12,94 милијарди евра, што претставува зголемување од 742 милиони евра или 6,1 проценти во однос на крајот на 2025 година.
Препорачано
Главна причина на растот е јавниот долг, кој е зголемен за 463 милиони евра и достигна 5,9 милијарди евра. Во Народната банка посочуваат дека најголем дел од растот произлегува од новата емисија на еврообврзници во вредност од една милијарда евра, при што истовремено бил извршен предвремен откуп на дел од претходна еврообврзница во износ од 384 милиони евра.
Приватниот сектор исто така ја зголемил задолженоста кон странство за 280 милиони евра, при што најголем раст е регистриран кај капитално поврзаните компании и банките.
Паралелно со растот на долгот, се зголемиле и надворешните побарувања на земјата. На крајот на март тие изнесувале 8,14 милијарди евра, што е за 523 милиони евра повеќе во споредба со претходниот квартал. Сепак, бидејќи долгот растел побрзо од побарувањата, нето надворешниот долг се зголемил за 218 милиони евра и достигнал 4,8 милијарди евра.
Загрижувачки останува и показателот за меѓународната инвестициска позиција. Негативната нето меѓународна инвестициска позиција на државата достигнала 9 милијарди евра, што претставува 49,1 проценти од проектираниот бруто-домашен производ за 2026 година. Тоа значи дека финансиските обврски на земјата кон странство и натаму значително ги надминуваат нејзините побарувања.
Според структурата на задолженоста, долгорочниот долг и натаму доминира со речиси 9,72 милијарди евра, додека краткорочниот долг изнесува 3,23 милијарди евра. Економските аналитичари оценуваат дека растот на надворешниот долг е очекуван поради потребите за финансирање на буџетот и рефинансирање на постојните обврски, но предупредуваат дека динамиката на задолжување ќе остане еден од клучните економски индикатори што ќе се следат во текот на годинава.
