Македонските фудбалерки по вторпат ја совладаа Летонија во квалификациите за СП 2023
Женската А репрезентација на Македонија ја оствари втората победа во својот претпоследен натпревар од европските квалификации за пласман на Светското првенство во Австралија и Нов Зеланд 2023 година.
Нашите најдобри фудбалерки денеска на тренинг центарот „Петар Милошевски“ во Скопје ја совладаа Летонија со 3:2, по вторпат во квалификацискиот циклус.
Гостинската селекција поведе уште во петтата минута со погодокот на Анастасија Рочане, но кратко траеше радоста на противничките.
Наташа Андонова за период од четири минути (13`, 17`) успеа да направи целосен пресврт за предност на македонските фудбалерки.
Андонова беше една од најзаслужните за освојувањето на бодовите, беше асистент во третиот погодок за нашата репрезентација во 72 минута, а стрелец беше Гентјана Рочи. Ривалот до крајот на средбата успеа само да го ублажи својот пораз преку Олга Шевцова во 79 минута.
На табелата Македонија, која одамна ги загуби шансите за Мундијалот, во квалификациската група „Д“ е на претпоследното петто место со шест бодови, три повеќе од Летонија на дното.
Последниот меч во овие квалификации избраничките на селекторот Кирил Изов ќе го имаат на 6 септември на гостувањето кај Австрија.