Македонија ремизираше со Шведска, против Исланд бркаме мундијалско четвртфинале
Кадетската женска репрезентација на Македонија одигра нерешено (20:20) против селекцијата на Шведска во првиот натпревар од главната фаза на Светското првенство кое се одржува во нашата земја.
Беше динамично прво полувреме, Шведска по 10 минути имаше предност од 4:1 и 6:2 и македонскиот селектор Љубомир Савевски побара тајм аут. Ние промашивме премногу шутеви и направивме неколку грешки во тој период.
Но, успеавме да го контролираме притисокот и по 20 минути игра и 4:9 на семафорот направивме серија од 5:0 и дојдовме до водство од 10:9. Добрата игра во одбраната и врвниот напаѓач Ива Младеновска беа пресудни за овој пресврт. На паузата имавме позитива од „плус два“ (12:10).
Лошо го започнавме второто полувреме, немавме гол во првите 10 минути, а тоа го искоријата Швеѓанките за предност од 13:12, а по 45 минути имаше водство од 16:15. Вистинска драма се случуваше во финишот, на само 20 секунди до крајот Шведска постигна гол за 20:19. Но, Македонија успеа да реализиран гол во последниот напад и на крајот немаше победник. Младеновска беше најефикасна со пет голови, а голманката Јовановска блескаше со 11 одбрани и беше прогласена за ракометарка на натпреварот.
– Мислам дека ремито е фер исход. Имавме свои шанси, но Шведска е многу добар тим и одигра многу добро – рече Савевски по мечот.
Со ова реми избраничките на Савевски се најдоа на чекор од пласман во четвртфиналето на Мундијалот. На следниот меч на 5 август (петок) од 20.30 часот ќе играме против Исланд во СЦ „Борис Трајковски“ – Скопје. На овој меч доволен ќе ни биде и бод за пласман во четвртфиналето.
Исланѓанките веќе го обезбедија местото во следната фаза по триумфот над Иран (28:17). На табелата во групата „1“ води Исланд со четири бодови, пред Македонија со три, следува Шведска со еден, а без бодови е Иран.