Лина Ѓорческа не успеа да стигне до втората титула во 2025 година откако денеска е поразена во финалето на ИТФ W35 турнирот во Куршумлијска Бања, Србија (награден фонд 30.000 долари).

Поуспешна од македонската тенисерка беше првата носителка Романката Мириам Булгару која победи со 2:1 во сетови (5:7, 6:1, 6:0) за два часа и 15 минути игра. Ова за Ѓорчесска беше второ сингл финале во 2025 или вкупно 37. во кариерата и остана со 14 титули.

Во првиот сет Ѓорческа имаше еден брејк повеќе од противничката и водеше со 5:3, но Булгару изедначи на 5:5. Ѓорческа ги освои следните два гема и стигна до водство од 1:0 во сетови.

Но, тука како да запре нашата тенисерка која до крајот на мечот во следните два сета успеа да освои само еден гем што значеше и триумф на нејзината противничка.

Ѓорческа за пласманот во финалето ќе освои 23 поени, а пријавена е за настап на турнир и следната недела во Куршумлијска Бања од рангот W75 што ќе се игра за награден фонд од 60.000 долари.