Во првиот натпревар од квалификациите за пласман во групите на ЕХФ Лига Европа денеска во СЦ „Јане Сандански“ – Скопје екипата на Вардар 1961 загуби со 25:34 од Рајн-Некар Левен.

Германците се поблиску до групите, а за македонската екипа предводена од тренерот Владо Недановски реваншот ќе биде „невозможна“ мисија во обидот да се анулира негативата на 3 септември.

Инаку скопските „црвено-црни“ беа рамноправни против фаворитот во текот на првото полувреме, најпрвин водеа на стартот со минимални 1:0 и 2:1, кои беа и единствената предност за домаќините на овој дуел.

Следуваше серија од 6:1 на гостите за „плус четири“ на семафорот, но бодрени од навивачите не се предаваа играчите на Вардар, со добра одбрана и неколку значајни интервенции на голманот Томовски стигнаа до израмнување од 12:12, а на паузата се замина со нерешени 14:14.

Се држеше Вардар и на стартот од вториот дел кога имаше само еден минус негатива (15:16), но при 17:18 германскиот гигант зададе нов сериозен удар со низа погодоци (6:0) што се покажа како клучно за крајниот епилог.

Рајн Некар водеше со 17:24, веќе се докажуваше поголемиот квалитет на ривалот кој постепено ја зголемуваше својата предност и истата стана и двоцифрена пред завршувањето на мечот (24:34).

За Вардар на оваа средба најефикасен беше Лазаревски со шест голови, еден помалку запиша Срдановиќ. На спротивната страна Кнор беше најрасположен со осум погодоци.