Македонија Ѓорче Петров потврди дека прволигашкиот клуб ова лето ќе го напушти Ѓорѓи Стоилов. Овој 27-годишен играч во единствената сезона во дресот на ѓорчепетровци во првенството запиша 23 настапи.

Претходно во клупската кариера Стоилов беше дел и од Шкупи, Зира (Азербејџан), Академија Пандев и Турново.

Одбранбениот играч Есмин Личина (25) и следната сезона ќе ги брани боите на Македонија ЃП откако официјално го продолжи договорот на една година. Оваа сезона во 1МФЛ имаше 22 настапи и еден погодок реализиран годинава во домашната победа над Работнички (2:1).

Потпис на нов едногодишен договор стави и фудбалерот од средниот ред, Стефан Лазаревиќ.

Воедно од клубот информираат дека подготовките за новата сезона ќе стартуваат на 7 јуни. Екипата ќе се подготвува во Словенија каде ќе одигра четири пријателски натпревари.

„Лавовите“ од Ѓорче Петров на 23 јуни ќе тестираат против Железничар, три дена подоцна ривал ќе им биде Целје, па на 29 јуни ќе се соочат со Радомље, а серијата контролни мечеви ќе заврши на 1 јули против Чукарички.

Исто така потсетување дека фудбалерите на Горан Симов ги очекува и настап во квалификациите на Конференциската лига.