Легендарниот актер Вилијам Шатнер го прослави својот 95-ти роденден, а по тој повод сподели објава на Инстаграм. Канадскиот актер објави колаж од две фотографии – на едната насмеан гледа во камерата, а на другата ужива со пура. Во описот откри што научил низ животот.

„На 95 години сè уште пушам! Научив две работи: никогаш не фрлајте добра пура и никогаш не им верувајте на оние што ви велат дека треба да се однесувате според вашите години“, порача тој.

Шатнер е најпознат по улогата на капетанот Џејмс Т. Кирк во првото издание на серијата „Ѕвездени патеки“. Првпат го толкуваше ликот во 1966 година, а подоцна се појави и во повеќе филмови од франшизата.

Во текот на долгата кариера, се истакна и со улоги во сериите “TJ Hooker” , “Boston Legal”, како и во комедијата “Miss Congeniality”.

Шатнер, кој со својата прва сопруга има три ќерки, во ноември 2025 година изјави дека се чувствува благодарен што е здрав и опкружен со семејството.

Минатата година зборуваше и за својата роденденска традиција, откривајќи дека редовно учествува во хуманитарен настан преку кој со години се собираат средства за деца и ветерани.