Денешната пресметка од првиот натпревар во првото квалификациско коло на Лига Европа во Ерменија ќе започне од 17.00 часот, а реваншот е на 18 јули на Националната арена „Тодор Проески“ – Скопје.

Своите очекувања во пресрет на дуелот ги споделија заменик капитенот на клубот, Дејан Тантуровски и шефот на стручниот штаб, Александар Таневски.

– Мислам дека сосема заслужено стигнавме до тука, денешниот натпревар ќе биде тежок за двете екипи, но ние сме максимално подготвени и се надеваме на позитивен резултат, а тоа е се освен пораз. За противничката екипа Алашкерт имаме голема почит, тие важат за една квалитетна екипа која што веќе 4 години по ред игра во европските натпреварувања. Тоа можеби ги прави фаворит, но јас мислам дека ќе биде сосема неизвесно, а тоа ќе го докажеме ние на денешниот меч – рече Тантуровски.

Тренерот очекува натпревар со добар противник, кој игра допадлив фудбал. Последните неколку години Алашкерт ја претставува Ерменија во европските натпреварувања, ги респектира и ќе влезат неговите фудбалери максимално претпазливо во првите 90 минути.

– Спремни го дочекуваме натпреварот, а неколку добри пријателски натпревари се знак дека сме добро подготвени за она што не очекува. Познавајки ги моите момци кои имаат силен лавовски карактер и многу пати до сега покажаа дека кога е најпотребно знаат да го дадат својот максимум ми дава за право да верувам во добар резултат на денешниот меч – вели Таневски.