Ана Крстаноска е млада и креативна жена, која стои зад еден од најубавите инстаграм-профили за храна кај нас – „Ана кичен корнер“ (ana_kitchen_corner).

Готвењето ѝ е вистинска пасија и хоби на кое му пристапува со голема љубов и посветеност.

– Спремањето храна го доживувам како мое хоби, кое го надополнувам со многу љубов и внимание секогаш кога сум во можност. Среќна сум кога им спремам нешто вкусно на моето семејство и моите пријатели и токму тоа ми ја полни душата со позитивна енергија – вели таа.

Денеска Ви го претставуваме нејзиниот рецепт за царска пита.

– Колоритна, вкусна, премека и брза за подготовка. Децата кај мене ја обожаваат. Пробајте ја и нема да згрешите – вели Крстаноска.

Потребни состојки:

• 4 јајца
• 200 мл јогурт
• 100 мл масло
• 100 гр палента
• 170 гр брашно
• 1 печиво
• малку сол
• 150 гр шунка
• 100 гр кисели крставички
• 200 гр.сирење по избор

Подготовка:

Изматете ги јајцата во чинија, па додајте ги јогуртот, маслото, солта, палентата, брашното и печивото. Изматете ги со миксер и додадете ги исечканите краставички, салама и дробено сирење, кои се мешаат со лажица.

Ставете ја смесата во намрсен плен, ставете сусам од горе и печете некои 40 минути на 180 степени, дури да зарумени во загреана рерна.

На здравје!