Месото од рибите туна, лосос, сардина и скуша е многу богато со омега-3 масни киселини и се препорачува да се јаде барем двапати неделно.

Доколку не знаете како да ја вметнете туната во своите оброци, ние ви пренесуваме многу интересна кулинарска идеја.

Крцкавите кнедли од туна и моцарела се совршен избор доколку немате многу време, а имате желба да пробате нешто многу вкусно.

Потребни состојки

• 300 гр конзервирана туна
• 200 гр крем-сирење
• 200 гр моцарела
• 1 јајце
• Три лажици лебни трошки
• Дополнително: лебни трошки за валкање на кнедлите
• Сол, бибер, магдонос, копар

Подготовка

Изматете го јајцето, па додајте му го крем-сирењето и моцарелата. Потоа, додадете ја и туната и убаво зачинете.

Додадете ги лебните трошки, сè убаво измешајте и формирајте топчиња со големина по желба. Секое топче извалкајте го во лебни трошки и пржете го додека не порумени.

На крај, ставете ги кнедлите на хартија за да се впие вишокот маснотии и послужете ги со сезонска салата и вашиот омилен сос.