Европската Kомисија (EK) следната недела ќе предложи новите ковид-19 сертификати да комбинираат информации за вакцинација, оздравени по болеста и резултати од тестовите за да се избегне дискриминација меѓу граѓаните, изјави денеска еврокомесарот за правда, Дидие Рејндерс.

Земјите од југот на ЕУ, кои се потпираат на туризмот, се надеваат дека ваквите „пасоши” може да ја „отклучат” летната сезона оваа година, но идејата наиде на противење од Германија, од Франција и од Белгија, кои нагласуваат дека вакцинацијата не е ниту задолжителна ниту достапна за сите.

– Работиме на сертификат, тоа не е„ пасош”, и не е во прашање само вакцинацијата. Станува збор за оздравени луѓе, вакцинирани или тестирани, истакна Рејндерс.

– Ние немаме задолжителна вакцинација, затоа е можно да се одбие вакцинирање. И во моментов немаме капацитет да организираме вакцинација за сите луѓе кои сакаат да се вакцинираат. Не сакаме да имаме каква и да е дискриминација, рече еврокомесарот за правда.