Ги следиме цените, со економските министри веќе разговаравме за идните мерки што ќе се преземат, пред сè, во делот на маржите и во делот на разликата во цените од производителите до финалната цена на рафт. Сигурно ќе следуваат нови мерки, зашто никој не може во време на криза да печали на грбот на граѓаните, изјави премиерот Димитар Ковачевски.

Во одговор на новинарско прашање во врска со поскапувањата на некои од основните производи, Ковачевски истакна дека интервенциите, најверојатно ќе бидат во делот на маржите и разликите меѓу производите и продажните цени.

Ковачевски најави дека ќе има проблем со млекото, поради што утре ќе одржи состанок со министерот за земјоделство Љупчо Николовски. Според него, се јавува криза во снабдувањето на млечната индустрија, има недостиг во некои региони во светот поради војната во Украина.

– Ќе има проблем кај млекото зашто се јавува криза во снабдувањето со млеко. Веќе утре имам состанок со министерот Николовски за тоа кои мерки ќе ги преземеме зашто се јавува недостиг во некои региони во светот на млеко поради војната во Украина, информираше премиерот.