Ковачевски му порача на Ахмети дека со картата на голема Албанија доцни 145 години
Премиерот Димитар Ковачевски порача дека спомен плочата со картата на голема Албанија доцни 145 години и дека музејот на ОНА отворен викендов во Сопот е на приватен имот. Тој порача дека се надева оти на сите земји од Западен Балкан карта ќе им биде обединета Европа.
-Тие такви настани секогаш предизвикуваат, со право, бура реакции кај граѓаните. Прво ако добро пресметав утрово, ставање на таа карта е задоцнето 145 години и ако по нешто може да се одслика какви биле односите на Балканот пред 145, 200 години се такви слични карти кои секоја држава на Балканот ги има, ама буквално секоја – вели Ковачевски.
Според информациите на премиерот музејот е изграден на приватен имот и дека тоа подлежи на одредени законски решенија, но не кажа дали се исполнети сите услови за музејот да се отвори.
-Ако се работи за општествен имот каде дозвола треба да даде општината, а како што видов Општина Куманово немала информации за тоа, сметам дека она што го имаме ние денес како општество не ги прави релевантни таквите мапи, бидејќи по 2001 година и по влегувањето во НАТО, ние во нашата држава имаме други мапи коишто се релевантни а тоа е мапата на државите членки на НАТО. И со отпочнувањето на преговорите со ЕУ, мапата која ние ќе кја имаме и се надевам сите земји од Западен Балкан е мапата на обединета Европа и тоа е единственото нешто кое треба да го обединува целиот Балкан, се друго е 145 години задоцнето – рече Ковачевски.