Парламентот на Косово денес одби да го потврди актуелниот премиер Албин Курти за премиер, зголемувајќи ја веројатноста дека ќе следат предвремени избори.

Курти, лидер на партијата Самоопределување и актуелен вршител на должноста премиер, доби само 56 од 120 парламентарни гласови. Опозициските партии Демократска партија на Косово (ПДК), Демократска лига на Косово (ЛДК) и Алијанса за иднината на Косово (ААК) гласаа против неговата кандидатура.

Засега не е познато дали претседателот ќе побара од втората или третата по големина партија да се обиде да формира владејачка коалиција.

Двете политички групи сметаат дека треба да се распишат нови избори, пренесува Ројтерс.

Опозицијата одбива да владее со Курти, критикувајќи го за неговото управување на односите со западните сојузници и неговите постапки во етнички поделениот северен дел на земјата, каде што живее српското малцинство.

Курти дојде на власт во 2021 година кога коалицијата предводена од неговата партија освои повеќе од 50 проценти од гласовите и обезбеди мнозинство од седум пратеници во косовскиот парламент.