Кога станува збор за факторите на ризик од рак на белите дробови, првото нешто што ни паѓа на ум се цигарите. Но, новата студија дава алармантни докази: оние кои консумираат таканаречена ултра-преработена храна во голема мера, имаат значително поголем ризик од развој на рак на белите дробови – дури и ако не пушат .

12 проценти од пациентите никогаш не држеле цигара во рака, а бројот на непушачи со рак на белите дробови се зголемува. Иако консумирањето тутун останува најголем фактор на ризик, се чини дека постојат и други фактори кои сè уште не биле во фокусот на науката.

Истражувањата во последните години покажаа дека големата потрошувачка на ултра-преработена храна – индустриски модифицирани производи со бројни адитиви, ароми и конзерванси, како што се безалкохолни пијалаци, производи од колбаси, готови јадења, грицки, инстант производи или спакуван бел леб – може да се поврзе со бројни хронични заболувања како што се дебелина, кардиоваскуларни заболувања и рак, бидејќи доведува до таложење на маснотии околу нашите органи, а досега не беше јасно дали овие намирници го зголемуваат и ризикот од рак на белите дробови, еден од најсмртоносните видови рак во светот.

Податоци од повеќе од 100.000 испитаници

Еден кинеско-американски истражувачки тим истражувал дали високата консумација на ултра-преработена храна го зголемува ризикот, особено од двете главни форми – ситноклеточен и неситноклеточен рак на белите дробови. Тие вклучиле податоци од 101.732 возрасни лица кои пополниле сеопфатен прашалник за начинот на живот и валидиран прашалник за фреквенција на храна на почетокот на студијата.

Во просек, испитаниците јаделе 2,8 порции ултра-преработена храна дневно, најчесто консумирале сушени месни производи, газирани пијалаци и бел леб. По 12,2 години следење, се покажало дека овој вид храна го зголемува ризикот од рак на белите дробови за дури 41 процент, меѓу нив ситноклеточен рак на белите дробови за 44 проценти и неситноклеточен рак на белите дробови за 37 проценти.

Овие корелации останале стабилни дури и по обемни анализи, на пример според возраста, полот, статусот на пушење или индексот на телесна маса.

Преработена храна како нов фактор на ризик

– Консумирањето на ултра-преработена храна може да биде потценет фактор на ризик за рак на белите дробови, без оглед на класичните причини како што е пушењето. Ова е особено значајно бидејќи ултра-преработената храна сочинува до 60 проценти од дневниот внес на енергија во светот. Непушачите исто така би можеле да го намалат ризикот од рак на белите дробови со исхрана со ниска содржина на ултра-преработена храна, предупредуваат научниците.

Тие објаснија дека ултра-преработената храна често содржи проблематични адитиви, големи количини шеќер, сол, заситени масти и има ниска густина на хранливи материи. Може да предизвика хронично воспаление, да ја наруши микрофлората во цревата и да содржи штетни супстанции настанати со преработката, а кои би можеле да имаат канцерогено дејство. Компонентите на пакувањето, како што се полихлорираните бифенили (PCB), исто така се осомничени дека го зголемуваат ризикот од рак.