Како што објави „Слободен печат“ Стојанче Јовановски, осомничен за наведување на самоубиство на сопругата Ивана Јовановска, која заедно со ќерката скокна од балкон на зграда во скопско Тафталиџе, ја бутнал по скали Ивана на 19 јануари годинава, додека таа била хоспитализирана на Клиниката за дигестивна хирургија при Клинички центар „Мајка Тереза“. Наспроти објавеното на нашиот медиум, дека на лице место излегле 2 социјални работнички, подоцна се утврди дека тоа биле две инспекторки од МВР а не две социјални работнички. Поради ненамерната грешка новинарката Мирослава Симоновска му се извинува на Центарот за социјални работи Скопје.

Од синдикатот во реакцијата велат и дека се сведоци на изнесени шпекулации во разни медиуми по однос на доставен записник од извршен вонреден инспекциски надзор кои се целосно невистинити, и тврдат дека до денот на објавување на овој демант истиот воопшто не е доставен во ЈУ МЦСР-Скопје.

Сметаме дека шпекулациите се тенденциозно изнесени, несомнено да водат кон дефокус на јавноста во насока на дискредитирање на улогата и постапувањето на стручните лица во Центрите, притоа прикривајќи ја вистината за непостапувањето на другите инволвирани страни при почитување на протоколите за мулти-секторско работење, во постапките за заштита од семејно насилство. Со вака изнесени непроверени информации, се нанесува голема штета на угледот и професионалноста на вработените во Центарот, кои се доведени со ситуација сами да се справуваат со невистините кои во јавноста се пласираат, а често се во ситуација на загрозена безбедност корисниците на социјална заштита.
Согласно наведеното, како синдикална организација изјавуваме дека силно ќе застанеме во одбрана на вработените, во насока да се заштити честа и угледот во професијата, а сметаме дека е крајно време да се спроведе процесуирањето на постапката, а со тоа и ќе се покажат вистинските факти кој и како постапувал, велат од Синдикатот на социјални работници.