Мисијата Артемис II на НАСА, чија цел е испраќање астронаути во орбита околу Месечината и нивно безбедно враќање на Земјата, би можела да биде лансирана веќе на 6 февруари, соопшти американската вселенска агенција. Доколку тоа не се случи, предвидени се повеќе алтернативни датуми за лансирање.

Оваа мисија ќе го означи враќањето на летало со човечки екипаж во близина на Месечината, првпат по ерата на програмата Аполо.

Иако астронаутите овојпат нема да слетаат на површината на Месечината, Артемис II претставува клучен момент во програмата и во долгорочните планови за идно трајно човечко присуство на Месечината.

Мисијата следува по беспилотниот пробен лет Артемис I, кој беше лансиран на 16 ноември 2022 година.

Како што потсетува Би-би-си, ова е сè што досега е познато за подготовките и можните датуми за лансирање на мисијата.

Подготовки за Артемис II

Од средината на јануари, НАСА влегува во завршната фаза на подготовките за Артемис II, која ќе биде првиот лет со екипаж на ракетата „Спејс лонч систем“ и вселенското летало „Орион“.

Меѓу астронаутите во оваа мисија, Кристина Кох ќе стане првата жена што ќе лета околу Месечината, додека Виктор Гловер ќе биде првиот црн астронаут во ваков подвиг. Дел од екипажот се и Рид Вајсман и астронаутот на Канадската вселенска агенција Џереми Хансен.

НАСА соопшти дека се подготвува целосно склопеното летало да го премести на лансирната рампа 39Б во Вселенскиот центар „Кенеди“ во Флорида, најрано во сабота, 17 јануари.

Извлекувањето на ракетата од зградата за склопување летала ќе го означи почетокот на финалната интеграција, тестирање и генерални проби пред лансирањето.

Овој процес, сепак, не е брз. За време на транспортот, леталото треба да помине околу шест и пол километри, а целото движење може да трае и до 12 часа. Од НАСА предупредуваат дека датумот на преместување може да биде поместен доколку се појават дополнителни технички зафати или доцнења.

Подготовки на лансирната рампа

По пристигнувањето на рампата, ќе следуваат дополнителни подготовки за мисијата, вклучително и поврзување на електрично напојување, системите за контрола на околината и линиите за криогено гориво.

Сите интегрирани системи за првпат ќе бидат активирани истовремено на самата рампа, со цел да се провери дали ракетата и копнената инфраструктура функционираат според предвидувањата.

По завршувањето на овие тестови, екипажот на Артемис II – астронаутите Рид Вајсман, Виктор Гловер и Кристина Кох, заедно со Џереми Хансен – ќе извршат завршна обиколка на лансирната рампа.

Генерална проба пред лансирањето

Кон крајот на јануари 2026 година, НАСА планира генерална проба пред лансирањето, која ќе вклучува целосна симулација на одбројувањето, како и демонстрација на способноста во ракетата да се наполнат повеќе од 700.000 галони течен водород и течен кислород.

За време на пробата ќе се увежбуваат процедурите за одбројување, полнење и празнење гориво, како и завршните операции, без присуство на астронаути во леталото.

По успешно завршената проба, НАСА ќе ги анализира сите системи пред да се определи конечниот датум за лансирање.

Временска рамка за лансирање на Артемис II

Временската рамка за лансирање се отвора на 6 февруари, но конечниот термин ќе зависи од техничката подготвеност и орбиталните ограничувања, соопшти НАСА.

Можни периоди и датуми за лансирање до април:

– 31 јануари – 14 февруари
Можни датуми: 6, 7, 8, 10 и 11 февруари

– 28 февруари – 13 март
Можни датуми: 6, 7, 8, 9 и 11 март

– 27 март – 10 април
Можни датуми: 1, 3, 4, 5 и 6 април

Луѓето се враќаат во Месечевата орбита: Прва мисија со астронаути закажана за следната година