Рјоју Кобајаши по трет пат во неговата кариера доаѓа до „Златниот орел“ на Новогодишната турнеја „Четири скокалници“ во ски скокови, откако на последната четврта скокалница дојде до второто место.

Интересен е податокот што на сите скокалници, во Оберсдорф, Гармиш-Партенкирхен, Инсбрук и Бишофсхофен, Јапонецот беше второпласиран, што му беше доволно со собраните поени во генералниот пласман да ја освои турнејата.

Последен пат ова се случи во 1999 година кога славеше Финецот Јане Ахонен.

Во Бишофсхофен триумфираше Австриецот Штефан Крафт со скокови од 136,5 метри од првата и 140 метри од втората серија.

Кобајаши во првата серија имаше скок од 137 метри, додека во втората 139. На третата позиција се најде Словенецот Анже Ланишек со 134,5 и 141 метар.