Клоп пресече, ќе носи дефанзивец од Бундеслигата
Менаџерот на англискиот шампион мора да купува дефанзивец и веќе е избрана замената за Ван Дајк.
Ливерпул западна во огромни проблеми со одбраната откако и дефинитивно беше потврдено дека за Вирџил ван Дајк сезоната е завршена по повредата на вкрстените лигаменти на коленото.
Менаџерот Јирген Клоп, мораше да експериментира со Фабињо во одбраната иако тој е играч од средниот ред, додека Жоел Матип е повреден, Џо Гомез за многумина нема квалитет да игра во Ливерпул, додека младите играчи не се подготвени за нивото на фудбал кој го бара Клоп. Згора на тоа, Ливерпул во летниот преоден рок го продаде Дејан Ловрен, а не донесе замена за него и поради дефицитот на дефанзивци, Ливерпул во зимскиот преоден рок ќе биде активен.
Иако се споменуваа имиња како тоа на Мартин Шкрињар од Интер или тоа на Бен Вајт од Брајтон, Ливерпул и Клоп започнаа преговори во Шалке.
Желбата на Клоп се вика Озан Кабак кој и во летниот преоден рок се споменуваше како потенцијално засилување но тогаш за него се интересираа и Интер и Милан кои немаа доволно пари.
Ливерпул со многу желби: Кој ќе го замени повредениот Ван Дајк?
Кабак е 20-годишен штопер за кого Шалке бараше 50 милиони евра иако речиси сите сметаат дека тоа е нереална цена поради корона кризата која предизвика огромни финансиски проблеми кај сите екипи.
Ливерпул е подготвен да плати 30-тина милиони евра со бонуси и се надеваат дека Шалке ќе биде приморан да ја прифати нивната понуда бидејќи германскиот тим се наоѓа во тешка финансиска криза.
Озан Кабан во Шалке пристигна 2019 година од Штутгарт за сума од 15 милиони евра.