Новиот претседател на Државната комисија за спречување на корупцијата (ДКСК), Адем Чучуљ, денеска ја даде својата свечена заклетва пред претседателот на Собранието, Африм Гаши, истакнувајќи дека ќе се залага за целосна транспарентност и отчетност во работата на институциите.

Чучуљ нагласи дека за него претседателската функција претставува голема чест, но и сериозна одговорност, особено поради предизвиците со кои се соочуваат Комисијата и државата во борбата против корупцијата.

Одговарајќи на новинарско прашање, тој посочи дека фокусот на ДКСК ќе биде насочен кон дигитализација, зајакнување на превентивните алатки и подготовка на новата Национална стратегија за спречување корупција, која се изработува инклузивно со сите релевантни чинители.

Чучуљ најави зголемена проактивност во проверките на имотната состојба на избраните и именуваните лица, што е една од забелешките во Извештајот на Европската комисија и шеста препорака на ГРЕКО.

Адем Чучуљ беше едногласно избран за претседател на ДКСК во Собранието, добивајќи поддршка од 82 пратеници.