Кинеските производители на автомобили ги престигнаа јапонските конкуренти во вкупната глобална продажба на возила во 2025 година, заземајќи ја водечката позиција во светот за прв пат, објавија јапонските медиуми. Според јапонскиот бизнис весник Nikkei, вкупната продажба на јапонските автомобилски компании малку се намали на околу 25 милиони возила, што доведе до тоа Јапонија да ја изгуби својата долгогодишна водечка позиција за прв пат од 2000 година. Во исто време, кинеските производители достигнаа приближно 27 милиони продадени единици на глобално ниво.

Податоците се базираат на извештаи од водечки компании и анализа од платформата за автомобилски податоци MarkLines, објави Xinhua. Меѓу индивидуалните производители, кинескиот BYD го престигна американскиот Ford и го зазеде шестото место на глобалната листа, додека Gelly ја престигна јапонската Honda и се искачи на осмото место. Вкупно шест кинески компании се меѓу 20-те најголеми производители на автомобили во светот, вклучувајќи ги Chery, Changan, SAIC и Great Wall, додека Јапонија има пет претставници на таа листа. Во сегментот на електрични возила, BYD ја престигна и Tesla и стана најголем продавач на електрични автомобили во светот.

Танг Џин, виш истражувач во јапонската банка Мизухо и експерт за автомобилскиот сектор, истакна дека искачувањето на Кина на врвот е повеќе од едноставна промена во рангирањето. Ова, рече тој, укажува на подлабоки промени во глобалната автомобилска индустрија, при што конкурентноста на кинеските производители расте врз основа на технолошки иновации, пониски трошоци за производство и побрз развој на нови модели. Во исто време, додаде тој, јапонските компании ќе треба да ги прилагодат стратегиите, особено во областите на електрификација и перформанси на клучните глобални пазари, за да одговорат на зголемената конкуренција- пренесе Политика.