Десетици градови низ Кина, вклучително и Вухан, каде за прв пат беше регистриран коронавирусот, влегоа во нов локдаун, во време кога земјата продолжува со својата „нула-ковид“ политика, пишува Би-Би-Си.

На повеќе од 800.000 луѓе во една област во Вухан им беше кажано да останат дома до 30 октомври.

„Ние се чувствуваме вкочанети поради сето тоа. Се чувствуваме сè повеќе вкочанети“, изјави еден локален жител за Ројтерс.

Градот Женгжу, дом на најголемата фабрика за производство на телефоните „Ајфон“ во светот, исто така беше погоден од најновите заклучувања.

Тоа доаѓа откако Кина трет ден по ред пријави повеќе од 1.000 случаи.

Претходно овој месец, кинескиот претседател сигнализираше дека нема да има олеснување на ковид политиката, нарекувајќи ја „народна војна за запирање на ширењето на вирусот“.

Од 24 октомври, околу 28 градови низ целата земја спроведуваат одреден степен на мерки за заклучување, со околу 207 милиони луѓе погодени во региони одговорни за речиси четвртина од кинескиот БДП.

Низ целата земја, во последните денови беа спроведени околу 200 заклучувања – поголемиот дел од ова ги погодува заедниците кои беа означени како висок или среден ризик. Жителите во различни области подлежат на различни правила, во зависност од тоа дали се во зона со низок, среден или висок ризик.

Вухан објави до 25 нови инфекции дневно оваа недела, со повеќе од 200 случаи во изминатите две недели.