Касано: Роналдо е слепец кој мисли дека може да игра до 50 години
Aнтонио Касано честопати знае да го критикува Кристијано Роналдо, па така беше и по интервјуто на Португалецот кај Пирс Морган.
Најголемо внимание од објавените делови до сега привлече моментот во кој Роналдо отворено зборува дека нема почит за Ерик Тен Хаг, потоа ги критикува Руни, Невил и сопствениците на клубот.
Италијанецот Антонио Касано одлучи да го коментира ваквото излагање на Роналдо и испрати жестоки критики.
„Роналдо едноставно нема храброст да признае дека не е истиот играч во последните три години. Оваа година мораше да оди во Спортинг и после Светското првенство да се пензионира. Тој е проблем за тренерите, не влијае добро ниту на соиграчите. Својата лоша страна ја покажа и со тоа што се уште не му честитал на Карим Бензема за „Златната топка“.
„За мене Роналдо е слепец кој мисли дека може да игра до 50 години. Драг Роналдо, ќе те советувам една работа, заврши на голем начин после светското првенство. Неговото его е преголемо, не е како Меси кој може да игра и со само неколку добри играчи околу себе. Роналдо само уште еднаш ја потврди неговата себичност и желбата самиот себе да си биде на прво место“, изјави Касано.
Светското првенство започнува во недела со натпреварот помеѓу Катар и Еквадор, а Роналдо нема загарантирано место во стартниот тим на Португалија. Со оглед на се што се случуваше во изминатиот период нема да биде изненадување ако натпреварите ги започнува од клупата.