Повеќето експерти за исхрана велат дека здравата ужина во текот на денот може да ви помогне во здравјето, а грицките не се здрава ужина.

– Проблемот е што повеќето грицки што се продаваат денес не се вистинска храна – објаснува д-р Џек Волфсон, кардиолог.

– Тие се произведуваат во фабрики, полни со преработени масла, рафиниран скроб и хемиски ароми, и речиси не обезбедуваат вистинска хранлива вредност.

Кардиологот предупредува дека постојаното консумирање таква храна може да го промени метаболизмот, да ги зголеми воспаленијата, да предизвика осцилации на шеќерот во крвта и да ги оптовари артериите.

Вашето сетило за вкус можеби ја сака оваа храна, но вашето срце не, пишува „Парада“ (Parade).

– На срцето му се потребни минерали, антиоксиданти, здрави масти и постојан извор на енергија за да функционира добро. Не може да напредува со празни калории. Кога некој ќе премине од преработени грицки на вистинска, интегрална храна, срцето често реагира брзо. Свеста е првиот чекор кон таа промена – вели д-р Волфсон.

Ужина што кардиологот советува да ја избегнувате

– Чипсот обично ги содржи токму состојките што му штетат на срцето – објаснува д-р Волфсон.

Ако сакате второ мислење (што е сосема во ред!), го истражиле и тоа:

– Чипсот од компири е особено штетен поради неговата поголема содржина на масти и акриламид во споредба со чипсот од пченка, иако сите видови чипс се ултрапреработена храна што го зголемува ризикот од кардиоваскуларни болести и треба да се јадат умерено – вели д-р Колумбус Батист, кардиолог во Кајзер Перманенте во Риверсајд, Калифорнија.

Акриламидот е соединение што се формира во текот на готвењето на високи температури и е поврзано со болести на срцето во бројни студии.

Зошто чипсот му штети на срцето

Кардиолозите велат дека чипсот е богат со масти и натриум и дека е преработена храна. Ништо од тоа не е добро за срцето.

Еве зошто постојаното јадење чипс има негативно влијание врз здравјето на срцето:

Чипсот содржи нездрави масти

– Чипсот му штети на срцето првенствено поради високата содржина на заситени масти, што го зголемува лошиот (ЛДЛ) холестерол – вели д-р Батист.

Американското здружение за срце препорачува внесот на заситени масти да биде под 6 отсто од дневните калории. Во исхрана од 2.000 калории на ден, тоа е околу 13 грама или помалку. Пакување чипс има 1,5 грама заситени масти – 11 отсто од дневниот внес и 10 грама вкупни масти. Во текот на денот тоа се собира.

Д-р Волфсон, исто така, истакнува дека маслото во чипсот е главниот проблем.

– Повеќето чипсови се пржат во индустриски растителни масла како што се масло од канола, пченкарно, соино, сончогледово. Овие масла се обработуваат на високи температури и притисоци, а потоа се загреваат дополнително во текот на пржењето. До моментот кога чипсот ќе стаса до вас, маслата често содржат оксидирани масти кои ги иритираат крвните садови.

Оваа иритација може да предизвика воспаление и да создаде основа за таложење на плаки во артериите.

Чипсот содржи рафиниран скроб

Луѓето со срцеви заболувања имаат поголем ризик од дијабетес тип 2 и обратно. Чипсот не помага во превенцијата поради рафинираниот скроб:

– Без разлика дали станува збор за чипс од компири, пченка или житарки, скробот многу брзо се претвора во шеќер. Овој нагол скок на шеќерот и инсулинот го поттикнува складирањето на масти, особено во пределот на стомакот. Исто така, ги зголемува триглицеридите, а покачените триглицериди се јасен знак дека некој е на пат кон проблеми со срцето – предупредува д-р Волфсон.

Чипсот има многу сол (и други адитиви)

– Комбинацијата од рафиниран скроб и оштетени масла дополнително го влошува крвниот притисок и задржувањето на водата, во споредба со природната сол во вистинската храна – додава д-р Волфсон.

Препорачаната дневна доза на натриум е до 2.300 мг, идеално 1.500 мг. Чипсот може да има околу 140 мг натриум по порција (7 отсто од дневниот внес). Ако јадете повеќе од една порција, тоа брзо се собира.

Дали печениот чипс е поздрав?

Делумно, но не многу.

– Печениот чипс е маргинално поздрав од пржениот, со помалку масти, акриламид и калории. Сепак, и понатаму лош нутритивен профил – богат со рафинирани јаглехидрати и натриум, без влакна, витамини и заштитни хранливи материи – вели д-р Батист.

Други видови чипс:

Чипс од компири: една порција (околу 15 парчиња чипс) има 150 калории и 10 г масти од растителни масла. Ниска содржина на влакна и протеини, брзо се вари.

Ароматизиран чипс од тортилја: често содржи мононатриум глутамат (МСГ), шеќер, вештачки бои и додадени масла. Прашоците за вкус поттикнуваат прејадување.

Може ли понекогаш да јадам чипс?

– Не велам дека никогаш не треба да јадете чипс. Луѓето сакаат крцкави, солени грицки. Препораката е да ги јадете еднаш неделно или поретко. Ако некој има висок крвен притисок, зголемени триглицериди, инсулинска резистенција, дебелина или срцева болест, треба да го јаде уште поретко – вели д-р Волфсон.

Д-р Батист советува да се држите до големината на порциите (околу 15 парчиња чипс). Печените или житарките од цело зрно се помалку штетни. Во комбинација со зеленчук или протеини, ужината станува поздрава и ја задоволува желбата за крцкавост.