Канибал од Берлин осуден на доживотна казна затвор
Наставник од Берлин е осуден на доживотен затвор за убиство на човек кој судот го процени како канибализам, пишува Би-Би-Си.
Судот утврди дека обвинетиот учител Стефан Р. убил инженер (43) во септември 2020 година за да ги „оствари своите фантазии за канибализам“.
„Она што го направивте е нехумано“, рече судијата Матијас Шерц.
Обвинетиот и убиениот се запознале преку апликација за запознавање, по што убиениот дошол на средба во станот на наставникот.
Наставникот таму го убил инженерот, му го распарчил телото и разнел делови на повеќе места во градот. Инспекторите тврдат дека жртвата не очекувала да биде нападната.
Судијата изјавил дека обвинетиот долго време размислувал за „колење и канибализам“ и дека посетувал такви форуми на интернет и доста читал на тие теми.
Инспекторите во неговиот стан пронашле пила за коски и специјални ножеви.
Убиството било откриено кога случајни минувачи пронашле коски во шума во Берлин, неколку месеци откако мајката на жртвата го пријавила неговото исчезнување.