Канада е победник на АТП Купот
Тениската репрезентација на Канада е победник на АТП Купот кој се игра во Сиднеј, откако во финалето беше поуспешна од Шпанија со 2:0.
Одлучувачкиот триумф го донесе Феликс Оже-Алиасим кој во два сета со 7:6,6:3 беше подобар од Роберто Баутиста Агут.
На стартот од мечот, Баутиста Агут поведе со 0:2, но Оже-Алиасим возврати со иста мерка, по што двајцата тенисери до крајот на сетот беа сигурни на свој сервис. Во тај-брејкот, поуспешен беше Оже-Алиасим кој славеше со 7:3.
Во вториот сет, прв се закани Шпанецот, во третиот гем имаше две брејк топки кои не ги искористи, додека Оже-Алиасим ја искористи својата прва брејк топка со која поведе со 5:3 и со сигурен сервис успеа да слави и да и ја донесе титулата на Канада.
Претходно, првиот поен го обезбеди Денис Шаповалов кој за точно 100 минути игра со 6:4,6:3 го пбеди Пабло Карењо Буста. Во полуфиналето, Канада го победи бранителот на титулата Русија.