Граѓаните кои викендов беа во Градски парк можеа да се уверат колку се вредни екипите на ЈП „Паркови и зеленило“. Среде најголемата гужва околу пладне, камионче за ѓубре возеше по пешачките патеки меѓу луѓето кои излегле на прошетка и меѓу растрчаните и разиграни деца и ги празнеше контејнерите.

На прашањето до јавното претпријатие нема ли посоодветно време за собирање ѓубре, наместо на пладне кога паркот е полн со луѓе, оттаму велат дека биле принудени тоа да го прават и во текот на денот.

Поради големата посетеност на Градскиот парк за време на викендите кога во корпите за отпадоци се фрла енормна количина на смет приморани сме собирањето на отпадот да го вршиме и во текот на денот, со цел да се спречи нивно преполнување, прелевање и расфрлање на отпадот низ паркот – тврдат од „Паркови и зеленило“.

Интересно е дека во паркот нашата екипа не забележа ниту еден полн контејнер поради што би било неопходно камиончето за ѓубре баш тогаш да вози меѓу посетителите.

Но, затоа забележавме голем број неискосени тревници со трева до колена.