Началничката на Секторот за сообраќајни работи во МВР, Маја Арсовска Манов, вечерва во гостување на „Телма“ рече дека системот „Безбеден град“ засега функционира само во Скопје, но на целата територија на главниот град.

Таа рече дека до крајот на годинава, системот ќе проработи и камерите ќе почнат да бележат прекршоци во уште два града во земјава.

„Активиран е електронскиот систем за детектирање на сообраќајни прекршоци, до крајот на месецот планираме да се активира истиот систем и во градовите Куманово и Тетово, а веќе од следната година истиот систем ќе биде имплементиран на територија на цела држава“, рече Арсовска-Манов.

Опремата е поставена и на Коридорот 8 и 10 и во секој момент се очекува да започне детектирањето на сообраќајните прекршоци и на автопатиштата, додаде началничката.