Иако на прв поглед потсетува на нашата сарма, полската сарма, позната како голабки, има сосема поинаков карактер.

Наместо кисела зелка, се користи свежа зелка, што му дава на ова јадење поблаг, полесен вкус и го прави погодно за подготовка во текот на целата година.

Уште една голема разлика е начинот на подготовка, овие сарми не се готват на шпорет, туку се печат во рерна, прелиени со супа од зеленчук (бујон) и пире од домати. Резултатот се сочни и меки сарми, кои совршено одат со пире од компири и павлака.

Состојки:

– 1 голема главица свежа зелка
– 1,5 кг мелено мешано месо
– 200 г варен ориз
– 1 голема главица кромид
– 2-3 чешниња лук
– 300 мл бујон
– 250 мл пире од домати
– 180 г павлака
– сол и бибер по вкус
– масло за пржење

Подготовка:

Во голем лонец загрејте вода и додајте сол. Со нож отстранете го тврдиот дел околу коренот на зелката, а потоа целата главица потопете ја во врела вода. Гответе 3-5 минути, додека листовите не омекнат и не почнат да се одвојуваат.

Внимателно одвојте ги листовите од зелката и со нож отстранете го задебелениот среден дел за полесно да се свиткаат.

Помладата посветла зелка има потенки и поеластични листови, кои полесно се виткаат и побрзо се печат. Ако зелката е постара, продолжете го бланширањето една или две минути за да не пукаат листовите.

Пржете го ситно исечканиот кромид во малку масло додека не стане стаклест и мек. Тргнете го од оган и оставете го малку да се излади.

Во голем сад соединете ги меленото месо, варениот ориз, пржениот кромид и ситно исечканиот лук. Зачинете со сол и црн пипер, а потоа добро измешајте додека не добиете изедначена смеса.

На секој лист од зелката ставете дел од филот и свиткајте ги во ролни, слично на класичните сарми. Наредете ги во огноотпорен сад за печење.

Држете го садот со капак или покриен со фолија поголемиот дел од времето за печење. Ако сакате благо запечена површина, откријте ги сармите во последните 10 минути.

Сармите полијте ги со бујон и пасираните домати. Поклопете го садот или покријте го со алуминиумска фолија и печете во рерна загреана на 180 степени околу 1 час.

Готовата полска сарма послужете ја топла, со пире од компири и кисела павлака.