Јапонски суши ресторан денеска понуди 510 милиони јени (околу 2,7 милиони евра) за една туна на новогодишната аукција на рибниот „Toyosu fish“ маркет, што претставува највисока цена досега. Туната, тешка 243 килограми, ја купи компанијата „Kiyomura Corporation“, оператор на популарниот ланец ресторани „Sushizanmai“, со седиште во Токио, пренесува „Ројтерс“.

„Се надевам дека економијата ќе се подобри оваа година. Администрацијата на премиерката Санае Такаичи ветува дека ќе работи, работи, работи, а така и ресторанот „Sushizanmai“ ќе работи, работи, работи. Се надевам дека оваа понуда ќе ги развесели сите“, изјави Кијоши Кимура, шеф на компанијата.

Досегашниот рекорд на од 333 милиони јени (1,8 милиони евра) од 2019 година е надминат со оваа аукција.

„Мислев дека победничката понуда ќе биде малку пониска, околу 300 – 400 милиони јени, но се покажа дека е над 500 милиони“, додаде Кимура, познат како „Кралот на туната“.

Џиновската туна е превезена во главниот ресторан на „Sushizanmai“, каде што е исечена и распределена на филијали ширум Јапонија. Според Кимура, туната ќе се продаваат по вообичаени цени за потрошувачите.